友誼小姐

她自稱為天仙, 相信無人敢話唔係! 人前人後兩個樣嘅佢, 大方得體, 八面玲瓏. 要佢扮小家碧玉得, 白姐姐又得, Man Eater亦得, 得咗! 如果唔係喺葵涌見過佢, 我真係唔敢相信呢個世界真係有D咁嘅人! 個人覺得佢嘅交際手腕真係一流, 無論工事定私事都好, 平衡得宜! 真係天生一副PR格, 注定要出嚟撈!

成班Friends入面, 佢嘅性格可算係最鮮明嘅一個. 不愛就不愛, 係嗰句講嗰句! 事關佢當你係Friends先比你見到佢最真嘅一面! 可能物以類聚, 大家嘅嗜好都好相似, 都係鍾意AV產品同發神經, 幾低能都有. 好似飲大咗嘅時候, 佢會好有禮貌咁問司機攞膠袋同講唔該! 深夜時份, 可以係尖東海傍上演當玫瑰遇上女魔頭之類嘅怪行. 分裂程度近乎爆燈, 遲一陣打鎮定劑都有可能會走出街跳脫衣舞嗰隻! 真係毫無保留其中一句歌詞嘅表表者, Natural High~~~

數數手指, 認識佢嘅日子其實都有番咁上下, 由一齊做Presentation開始到而家, 佢都真係幫咗我好多. 其實佢份人好聰明同孝順, 好知道自己做緊D乜! 唔怪得成日同人講 – 我撈邊行! 好老實, 佢對朋友真係好好, 完全唔係酒肉朋友嗰隻. 好留意朋友嘅嘢, 重會記喺個心度! 只係有時覺得佢會忽然間姨媽到咁, 令身邊嘅人好難做, 真係唔係個個都頂得順佢同遷就得佢!

有福氣

呢一個可謂係奇女子, 有好多經歷同波折但依舊開心快活人. 上天賜予佢有一個好幸福嘅家庭同對佢不離不棄嘅男朋友. 呢D福氣相信係佢上幾世修回來! 我哋唔係成日見, 但就會好關心大家. 還記得當我係澳洲讀書嘅時侯, 佢幫過我好多. 義無反顧同有義氣, 可能連男仔都未必做得到!

呢位女中豪傑, 比我嘅印象係, 爽快, 率直, 快樂同幸福! 真真正正係船到橋頭自然直嗰隻, 她是一個活例子, 話我知所有事都係天注定, 唔洗諗太多. 食幾多同着幾多係整定, 無需擔心, 凡事盡了力便算. 應快樂時該盡興, 要工作時便投入! 可能係呢一種生活態度, 令佢有呢個咁知足常樂嘅性格. 心境開朗, 人都真係會聰明D!

殺掉一D可惡嘅陋習, 妳嘅生活可以過得再幸福D! 唔好再浪費上天賜予妳嘅優惠, 幸福真係唔係必然, 要好好珍惜呀! 有機會係Week Day唔洗返工嘅時候, 我哋再一齊去High Tea 同唱Lunch K, Promise呀!

大方

要點樣稱呼呢一位先生, 佢嘅性格同佢嘅外形好似, 都係圓圓的. 基本上, 呢位朋友係我眼中永遠都係咁開心快樂, 只因他的眼淚只會在心裡流. 慷慨, 大方同唔計較, 令佢好輕易嬴取別人嘅信任. 但認識耐咗, 真係好想大把大把扯落去呢個聰明仔度. 因此人自我保護意識好強, 看似永不得罪人, 但用一套武功對所有人, 都總有一天會唔Work.

話時話, 佢都算係一位鐵人28, 可以玩通頂之後再去遊船河. 可能同佢平時Keep住踢波有關. 重有平日嘅活動, 佢都好樂意充當攪手一職, 相信同佢好鍾意成龍大哥有關, 事關佢影親相都慣性模倣偶像. 唔怪得佢咁有大佬風範! 做大哥真係做到入型入格, 佢敢認第二, 都無人敢認第一呀! 不過, 作為佢嘅朋友, 除咗吃喝玩樂以外, 有時都想見吓佢嘅內心世界. 唔好成日好似亞旺咁笑茄茄, 但又鍾意放毒蛇, 同佢打牌嘅時候最覺!

呢期比較少見面, 事關佢實在太忙, 唔係話要踢波就係公司大把嘢做. 我諗佢真係忙到連休息嘅時間都無, 呢D咪叫做有咁耐風流有咁耐折墮囖! 不過佢一世好命, 呢D日子好快就過啦! 相信佢呢一刻最需要一個好關心佢嘅人係佢身邊, 佢就會好滿足! 至於朋友, 心照啦!

濛

真性情, 自然, 情緒大上大落, 多愁善感係呢位快樂小王子比我嘅感覺. 同時"濛"正好是呢位朋友嘅代名詞. 我總覺得他看不清這個世界, 或者, 係佢刻意令人誤解佢真實嘅一面.

家庭自小已經給予小朋友一個很好嘅成長環境, 加上溫馴嘅個性, 令佢可以輕易成為朋友間嘅焦點. 其實真性情唔係唔好, 只係如果係唔適當嘅情況或場合出現, 效果可以好極端! 一個唔會害人嘅人, 我相信壞極都會有個限度. 將EQ控制吓啦! 還記得在澳洲第一次見到你喺Account堂度, 無諗過會同你係香港咁啱玩, 相信你嘅諗法同我都係一樣. 事關當時你好比一個暴風少年, 而係澳洲嘅我好比一隻內向嘅小羔羊, 同真實嘅我有很大差距, 諗起都覺得好笑!

我哋嘅緣份係天意嘅安排, 好比古巨基遇上黃柏高一樣, 注定你要跟我搵食. 我一定會將你捧到好似側田一樣咁紅. 跟住女魔頭只有一條路比你行, 就係死路呀! 唔想死就好似Smartone N年前嘅廣告嘅靈風咁 – 速逃!

我行我素

為人師表好榜樣, 係我由細到大對我敬畏嘅老師嘅良好印象. 諗唔到我嘅朋友會可以當上一份咁有意義嘅工作! 可惜, 呢位朋友將我由細到大對教師呢一種職業嘅印象徹底改變咗. 換來嘅感覺係 – 為人師表嘅操守係應該誤人子弟, 係課餘時間, 用電話同女學生爆Flirt! 呢D因素, 令我可恨自己無資格成為教育界嘅一份子.

我呢位教育界代表嘅朋友, 外表平凡但內在美真係滿到瀉曬, 中國歷史與文學無一不知曉, 我行我素同永不隨波逐流. 最愛看另類電影又好有個人目標. 佢話要儲錢去日本遊學一番, 目標同嗜好都可以咁Match, 好難得! 相信佢短期內就可以實行呢個目標同為國捐軀… Sorry, 係爭光先啱! 講真, 我真係好少朋友咁有理想同完全唔受外界影響, 可以咁從一而終去為理想而奮鬥.

其實我同佢完全係兩個世界嘅人, 呢段友誼完全係上天嘅安排同緣份. 令我們相遇, 全因SNK嘅真侍魂, 餓狼伝說3同拳皇95. 回想起, 圍繞我中學時代嘅一班朋友都係機佬. 真係好懷念當時我哋每個星期嘅機的約會!

隱形人

一班人入面, 佢唔出聲真係完全唔會察覺到佢嘅存在. 曾經佢同我講過一種關係嘅感覺, 好似叫做這麼近那麼遠? 唔太記得, 但有時真係好難界定佢係低調定慢熱? 同佢咁熟, 都要人好似當佢係車咁開到行一行先爽! 如果同佢玩吓一個沙漠嘅心理測驗, 相信佢個立方體一定係好大好大同載到滿滿嘅液體!

經常都目無表情, 憂鬱, 呆板同將自己上鎖, 係佢比人嘅感覺, 但一D都唔討人厭! 之不過, 隱藏係呢D表面嘅背後, 其實佢不斷毒害身邊嘅朋友一齊上賊船, 打波係, 玩具又係. 簡直好比沙淋毒氣事件嘅幕後黑手 – 麻元章晃一樣, 咁無良! 真係可以成立一個邪教, 當上教主之位! 到時有好嘢要多D益吓好兄弟呀, 至於賊船呢家嘢, 導D教徒將個教義不斷咁傳開去. 相信已經有好多人不幸中咗招啦, 社會要正視呢個問題呀!

講少少心底話, 其實我係好在意呢一位教主, 知道發生係佢身上嘅不快事有好多. 明白對佢嘅打擊好大, 完全係愛莫能助嗰隻! 不過我相信時間可以証明一切, 所有事都會過去的! 你一定會重見一條光明大道只要唔好放棄, 就好似你個教會咁, 長做長有, 唔洗擔心!

孩子王

只要係洗錢同玩有關嘅, 佢都一定好. 玩具相信係佢現時嘅最好朋友亦係佢嘅消暑良伴. 永遠一副玩世不恭嘅樣子視人, 看似無肉無求, 但其實內心空洞洞又有誰可以將冰山劈開? 認識此人耐咗, 更加覺得佢好鍾意將自己收藏起來, 看似成熟但很流於陰沉嘅一面! 自我中心派嘅黨員, 多數係固執同有自我嘅見解, 呢一點我好明白!

唔知點解, 與你溝通總比我嘅感覺係唔得痛快? 太過保護自己或有第二D原因? 可能工作經驗尚淺嘅我, 無咁高智慧去同你溝通. 但係有時人如果唔可以以真面目視人,別人係好難察覺到你想點! 唔好再經常搵借口去壓抑自己嘅真性情, 忠於自己係好, 但口不對心, 騙到人, 騙不了自己! 想做就去做, 思前想後, 有時實在係浪費緊自己嘅時間! 呢個年代, 絕配真係可遇而不可求, 都唔知話你要求高定話你有特殊癖好?

為自身將來打算, 相信你已經有諗過同實行緊! 好應該比個機會自己同比個機會人, 以你嘅條件, 係香港地絕對有市場. 只要有時心態上唔好咁麻甩同學吓大方一D, 一定有收穫! 不過你呢期紅啦, 自從賣阜過寶島返嚟之後, 成個貴曬, 即刻上咗一線咁滯. 而家唔識人啦, 唔洗理吓本地市場D Fans啦! 真係飲水唔思緣呀!

大男人

認識咗好耐嘅朋友, 由相識到現在, 他的高度都從沒有改變過! 此人特質: 鹹濕同多毛, 係一隻不折不扣嘅小猿人. 我們有好多好攪笑嘅回憶, 例如我點佢飲奶可以增高, 點知佢真係去做, 之後變咗一隻小白豬但D毛多到由山頂望落去都睇得好清楚!

好多人都會尊稱呢位前輩, 好似"哥", "爺", "叔”"呀咁! 叫佢"仔"嘅話, 佢會回應你一句:你唔好去死! 大都唔比, 而家D人真係惡! 說實話, 此人其實係鱷魚頭老襯底, 個樣好似好惡, 實質係一隻貓, 重要係好溫馴嗰隻! 心地好到不得了, 亦係最多心底話嘅一個! 我見住佢由山雞變成鳳凰, 而家佢嘅自信心真係好強, 假以時日佢必定會得到佢應得嘅嘢, 我睇高你一線!

佢有好多地方都值得我去學習, 好似堅持同點樣去將胸襟放開D. 性格其實真係會影響命運! 此人, 行嘅路唔係多我好多, 但見嘅人一定比同年紀嘅小朋友多好多! 呢一刻不等於一切, 所謂學無前後, 達者為先. 未到最後一刻都唔好認輸, 我期待係你身上發掘更多新元素同新思維!

摩托人

他, 總給人的印象是一個好人, 一個很隨和的好好先生. 除咗玩以外, 佢都唔太計較在意得失. 但又經常將一D雞毛蒜皮嘅事掛係口唇邊, 令自己比人入到爆, 呢D都可算係佢比較起眼嘅美德. 以佢份人咁抵得諗, 一百蚊任做真係唔算貴啦, 咁好生意係實至明歸!

呢一位朋友嘅嗜好可謂動靜皆宜, 愛攝影又愛看書亦愛在公路上風馳電制. 在他的網上日誌, 字裡行間總帶點感性與內涵. 真係有才華而不造作. 有無人唔同意我咁講呀? 另一方面, 晚間時份佢會相約一班志同道合嘅車友, 一齊上演一幕烈火戰車. 依我個人覺得他戴上頭盔嘅時候, 真係勁似劉華, 有型到爆! 有機會大家一定要留意留意! 但除咗頭盔之後, 就好似恐龍戰隊嘅成員咁低調, 唔想咁Eye-catching. 可謂真人不露相, 露相非真人. 真係有苦自己知嗰隻!

好勝心不太強嘅人, 其實意志力係比較薄弱. 作為一個四寫五入快將三十嘅男人, 我覺得應該唔好太安於現狀, 可以衝嘅就應該不惜一切, Keep住個勢就去馬. 不然的話, 時間同體力就好似你嘅身體髮膚一樣, 越大越少! 到時真係喊都無謂! 應該為自己定下一個目標, 努力奮鬥到底!

先入為主

打響頭炮嘅係一位近期清減咗好多嘅朋友, 今次呢個Concept係佢俾咗Inspiration我先構思到一點突破. 所以由佢作為第一砲係對佢最高嘅致敬! 假如有一天我成為公眾人物, 呢一位朋友絕對不能留活口, 事關她知道我嘅嘢實在太多.

她, 是一位對自身要求極高, 好勝但又好理智, 樂觀而多愁善感但又好自得其樂, 從事傳媒工作嘅朋友. 一個Game已經可以滿足一整天時間. 如果佢係男仔, 一定係一個極富情趣但風流成性嘅好色賤格狂徒. 可是天對她好唔公平, 比少咗D嘢佢, 令佢成為一個有缺憾嘅正常女子! 唔好誤會, 我相信她有80%鍾意男人. 斷背應該無可能發生係佢身上!

經常同我唇槍舌劍嘅佢, 唔發白日夢嘅時候, 總係戰鬥格到底, 永不言敗. 經常將D事實用另一個角度去表達出一個令人火都滾嘅版本. 撩打指數達10級, 真係普通人喺街見到佢都想一把掌摑落佢度! 不過, 外剛內柔嘅佢都有好女性嘅一面. 只要將要求降低一D同打扮番女孩子 (想嘔)一點, Fans應該唔止電車男一個咁少! 信我, 以妳嘅資質同健談嘅個性, 小貓子同無鼻樑妳一定食硬!

個標題其實好襯妳, 相信妳一定知道點解! 都唔明女仔之家點解咁鍾意學人先入為主?

Prelude - 在我身邊

寫Blog生涯已經差不多一年時間, 經常老生常談有點兒千篇一律加上靈感與題材亦沒有受日常生活嘅衝擊而變得開始悶! 所以想開一個Project型式嘅課題, 而題材當然係同我身邊嘅朋友有關啦!

之後嘅十一次Update, 主題都會圍繞經常出現喺我身邊嘅朋友仔女. 我會用個別篇幅逐一去介紹佢哋, 根據我對他們有限度的了解同認識, 去描繪出屬於他們的一篇文章. 順便將佢哋Promote出去俾有緣人. 敬希各篇章的主角留言, 敬請留意!

分裂

人格分裂, 是都市人的通病. 對住屋企人一個樣, 朋友同老細又係另一個樣. 所以殘酷一叮同巴士亞叔咁受歡迎係有原因!

長期工作受壓, 又無途徑去舒緩一下. 輕則荷爾蒙失調, 重則精神錯亂. 真係死就一世, 唔死就大半世!

無間道生活, 其實每個香港人都扮演緊! 放咗工之後, 我同人講, 我係差人, 邊個知呀? 都市人, 幾低能都有, 相信更有一個係左右!

半成年

個人覺得成年的法定年齡唔應該係21歲, 因為精神年齡往往係比較遲熟! 貪玩嘅成年小朋友通街都係, 個人覺得他們是自由行以外消費能力最強嘅一群!

作為他們嘅一份子, 活在當下應該感到高興. 事關80歲回頭看, 曾經歲月燃燒. 懂得調節控制, 工作時工作, 遊戲時遊戲. 半成年的定義應該如此!

成長的短髮

琴日轉咗個新Look, 未試過剪到咁短, 好Fresh! 我諗應該三個月都唔洗去剪頭髮.

以下係我屋企人見到我個新Look嘅反應: -

亞媽: 個咩剪到成個一丘和尚咁呀?
回應: 同金魚比較, 我個人鍾意木魚多D, 所以唔介意做和尚!

亞哥: 嘩! 你啱啱出冊返嚟呀?
回應: 未入過冊, 唔清楚, 不過出冊應該仲短D. 大不了你可以問吓你以前D好朋友分享吓!

家姐: 叫咗你平時唔好咁寸, 而家得罪人啦?
回應: 我重未學滿師, 重要向你多多學習!

以上三人睇我唔順眼係可以理解, 但好似到目前為止都無幾多個欣賞我個新Look, 但係我自己幾鍾意呢個髮型. 真係好舒服!

滄海遺珠

沒有運氣的天使; 是命運嗎? 性格改變命運, 定命運影響性格? 到呢一刻都沒有人找到答案!

有人說, 千里馬沒有遇上伯樂, 只是一頭好普通嘅馬. 但如果伯樂沒有遇上千里馬, 便不會有伯樂這稱許!

好, 受別人讚賞才稱得上. 孤芳自賞的才不叫人希罕!

際遇, 好比一切更重要. 你們覺得對嗎?

名牌

好耐都無同媽咪行過街, 不過呢個星期二收工同佢行銅鑼灣SOGO, 買咗三大袋戰利品. 她真係一個不折不扣嘅購物狂, 完全無金錢嘅Concepts!

短短個半鐘, 我同佢各人花咗差唔多五千蚊! 每人都買咗個名牌袋. 講真, 個袋其實唔太值咁貴但經過無Comission分但Sell得最落力嘅媽咪出動咗佢嗰三寸不爛之舌... 最後我俾佢K.O.咗! 平時只有我Sell人, 好少俾人Sell番轉頭, 今次真係老貓燒鬚呀!

呢D應該係遺傳. 我唔係指購物狂, 而係嗰種見到朋友買嘢嘅"喜悅"! 真係好似我好心導D Friends買嘢咁爽! 我諗我亞媽都有呢種咁變態嘅快感, 呢D唔叫遺傳, 可以叫咩呀?