一了百了

今日一早就同阿哥入咗沙田同老豆飲茶慶祝父親節. 送咗個一早預備好既Bally銀包畀佢, 感覺佢好似唔係好鍾意? 是但啦, 反正佢除咗現金之外乜都唔大興趣!

而今晚既活動就係去睇紅館休館前最後一個演唱會-陳慧琳“Love Fighters演唱會08”, 睇報導個Rundown既歌其實同之前既演唱會有9成相似. 都唔知佢想點? 連“有時寂寞”都唔唱, 可能佢一早預咗隻新碟會仆直, 新歌無人識啦! 建議佢都係早D收山為妙, 反正人氣已經大不如前, 佢都R咗我唔少金錢同時間, 而條佬又搵到下. 大方D學人退下火線做少奶奶啦! 不過收皮之前, 我都好想佢係今晚唱佢算近年我幾鍾意既一首歌“Happy Girl”畀佢Daddy聽, 適逢今晚又係父親節, 聽聞佢話呢首歌係度身訂造畀佢老豆. 當臨Bye前派番少少利息過我, 話晒成$480一張飛, 唔係唔唱呀?

如無意外, 今年既大計都無乜機會達成. 都係過多幾年先諗呢樣野, 反正對我黎講投資性質重多過自住. 可以Resume繼續享受人生至上! 諗諗下, 呢種投資反而加重我既壓力, 都係等人工高D, 份工再穩定D先再去考慮過大投資既Project!