無間道

係大家先入為主之下, 馬田史高西斯嘅最新作品-無間道風雲, 被完全比下去絕對係理所當然. 無可否認, 史高西斯今次真係將無間道呢個品牌改到體無原膚, 亦沒有將原版嘅內心戲同精髓拍出來. 服裝方面, 比原裝版本有好強烈嘅對比. 荷里活版本比較Casual一點, 我相信呢一點係史高西斯刻意去令無間道親民一點. 相信背後一定別有用心或有深層意義.

選角方面, 以里安納度同史高西斯嘅交情, 好角色自然會優先預留畀佢. 但里安納度太過Baby Face, 根本Carry唔到陳永仁呢個角色, 而麥迪文完全掌握唔到劉健明嘅神髓. 兩者給觀眾嘅感覺都沒有了原版的大將之風, 好難信服觀眾. 但個人認為, 如果由畢彼特演梁朝偉的陳永仁, 湯告魯斯扮一向One Dog Face嘅劉德華會更有噱頭. 起碼亞洲人會易受落一點. 至於成套戲, 我最欣賞積尼高遜嘅Frank一角, 即曾志偉的韓琛. 用另一個角度去描寫呢個角色嘅陰暗面, 係全劇改動得最討好嘅一角. 當然, 積尼高遜嘅演技亦應記一功!

今次, 對馬田史高西斯真係有點失望, 証明了改編劇本完全唔係佢杯茶. 一個絕唔容許自己拍的電影甘於平凡嘅導演, 將大量個人風格加進一部已經相當完美嘅劇本內. 觀眾將新舊比較係必然, 新不如舊亦係事實. 無間道風雲失敗在於原裝版實在太完美! 難怪馬田史高西斯亦要事先聲明話唔會再拍改編電影.