流行曲

今次真係想真真正正咁係呢度談談音樂. 自己由細個4-5歲開始已經受家姐影響, 好鍾意聽歌. 我諗同我年紀相約嘅朋友應該無幾個同記得林姍姍係出過唱片! 其實我細個係好鍾意聽林憶蓮, 林姍姍, 陳慧嫻同張國榮, 因為我家姐愛到佢哋死. 好記得家姐有次講笑話: "如果哥哥見過佢就一定唔會攪基~~" 我覺得好攪笑!

我自己比較鍾意聽一D較輕快, 有含意同無咁悲嘅歌. 好似許志安嘅心靈相通, Shine嘅伊利莎伯太遲來,曼谷瑪利亞同半成年, 何韻詩嘅水花四濺同沙, 重有陳慧琳嘅最佳位置同大日子等等... 其實重有好多好多一時間唔記得同不能盡錄! 至於近期自己比較欣賞嘅新歌手有側田, 吳雨霏(Kary)同王菀之. 特別係王菀之, 我覺得佢把聲好溫柔同好有大自然嘅感覺! 至於我自己覺得比較滄海遺珠嘅係蕭亞軒, 有型有格同聲色藝俱全卻突然消失咗! 好鍾意佢有呢幾首歌 - 給我重新愛你的機會, 明天, 天使暫時離開同我愛你那麼多. 重有係偶像男子組合 - Shine嘅歌我都覺得好有意思, 例如燕尾蝶同曼谷瑪利亞等等...

知道好難三言兩語咁係呢度表達我有幾鍾意聽歌, 就當我無病呻吟或知少少扮代表啦! 但如果有興趣嘅講, 可以搵日同我交流一吓你哋對聽歌嘅喜好. 流行曲或廣告歌都可以! 唔知我哋聽歌嘅品味一唔一樣呢?